Buscando un topico?
Mustra tur topico

Traimerdia pa Scol Secundario a bira realidad pa hobennan di EPB San Nicolas
Diamars 18 di November di 2014 00:00

Na aña 2014 Gabinete Mike Eman II a cuminsa traha riba e proyecto di "Naschoolse Opvang" (Traimerdia) pa Scol Secundario. Minister di Asunto General, Mike Eman y Minister di Enseñansa, Michelle Hooyboer-Winklaar ta haciendo esaki den cooperacion estrecho cu otro.


Cu un Traimerdia pa Scol Secundario ta cumpli cu e necesidad di hopi hoben y nan mayornan. Pa e hobennan, e Traimerdia ta un bon luga pa comparti cu otro persona di nan mesun edad y participa hunto den actividadnan agradabel. Pa mayornan, e Traimerdia ta un luga sigur pa nan yiunan ta parti atardi. Pa medio di e proyecto aki, ta yena un bashi grandi.

Durante hopi encuentro Ministers Mike Eman y Michelle Hooyboer Winklaar, a haya hopi pregunta riba un centro di cuido pa hoben. Tambe den Dialogo Social, durante tratamento di e tema di Siguridad, a trece traimerdia dilanti como sugerencia. Awo e idea tin contenido y ta den pleno ehecucion.

Den e Traimerdia kier ofrece un programa atractivo pa e hobennan na nan mesun scol. Esaki ta posibel danki na e cooperacion di organisacionnan comunitario y ciudadanonan, bou guia profesional. Un parti di e programa ta, por ehempel, un almuerzo hunto. Banda di esey, ta laga espacio pa movecion, wega, musica y teatro, entre otro.

E Traimerdia pa Scol Secundario ta destina pa hobennan studiante di EPB, MAVO, HAVO Y VWO.

For di dia 10 di november ultimo, e Traimerdia pa hobennan di klas 1 y 2 ta na EPB San Nicolas ta un realidad. Cu hopi entusiasmo, e prome grupo di e Traimerdia a inicia su prome siman. Esaki a inclui un workshop di traha film. Rond di 20 hoben a traha den ekipo y a hinca den otro nan mesun idea pa un film. Nan a graba y edita esaki bou supervision di e conocido artista Ryan Oduber. Di e manera aki a produci cuater, asina yama, ‘short films.’ E muchanan a traha tur dia riba esaki, bou guia di Tanja Fraai y Mike Ho-Sam-Sooi. E topico di e filmnan a varia entre San Nicolas y su nomber di ‘Chocolcate City,’ e tentacion di forma parti di un gang te, na e atractivo di, Aruba Dushi Tera. Esnan interesa den wak e producto final di curso, por wak e short film riba e pagina di Facebook di NSOARUBA.

Diabierna 14 di november, tur e studiantenan a ricibi un certificado. Na final di e encuentro, tabatin un sorpresa pa e oficina di Traimerdia. Boolchands a haci entrega di un bunita beamer cu e proyecto di Traimerdia por haci hopi bon uzo di dje. E workshop di cine tabata posibel danki na sosten di TNO Aruba, Divi Resorts, Total Service N.V., Boolchands y Balashi.

 

Info/Contact

Ministerie van Onderwijs en Gezin