Buscando un topico?
Mustra tur topico

Disciplina Consciente®

Den e ultimo añanan e sociedad a bira mas complica y asina tambe e desaroyo social emocional y e retonan riba tereno di comportacion di nos alumnonan ta pidi atencion specifico di nos scolnan.

Na november di aña 2011, despues cu Minister di Enseñansa y Husticia mr. drs. Arthur Dowers a asisti na un workshop di Disciplina Consciente organisa pa Develop to Grow, a dicidi pa duna tur maestro di scol preparatorio y basico na Aruba e oportunidad pa conoce e programa aki.


E programa di Disciplina Consciente® ta duna tools cu por contribui na un miho educacion social emocional di nos muchanani.

Disciplina Consciente®, desaroya pa Dr. Becky Bailey, den contexto di scol ta un sistema di educa mucha den cual ta integra maneho di klas cu e desaroyo social emocional di e alumno, trahando tanto na e inteligencia emocional di e mucha como di e maestro. Saliendo for di e punto di bista cu pa un adulto por guia un mucha riba tereno social emocional, e mes mester conoce su mes y traha riba su regulacion propio.

E maestro ta bira habil pa responde riba conflicto diario na un manera consciente, transformando asina e conflicto den un oportunidad pa e mucha desaroya habilidad social-emocional importante pa bida.

Disciplina Consciente® ta "evidence-based" y a wordo nombra pa Florida State Legislature como modelo nacional pa educacion di caracter.

Websites:

Conscious Discipline

Develop to Grow

 

Programa

Disciplina Consciente® ta basa riba:

  1. E modelo di estado di cerebro
  2. E shete podernan pa un adulto consciente
  3. E famia di scol™
  4. E shete habilidadnan di disciplina


1  Estadonan di cerebro

E modelo di estado di cerebro ta e cuadro di referencia pa nos compronde e estado interno di e cerebro cu ta produci cierto comportacion den mucha y tambe adulto. Si nos ta consciente di e tres estadonan di cerebro cu ta estado di sobrevivencia, estado emocional y estado ehecutivo, nos por maneha nos pensamento y emocion na un manera cu nos por yuda e mucha pa siña maneha di dje.

Ora nos ta sinti insigur nos cerebro ta bay den estado di sobrevivencia. Pa sali for di e estado aki, nos mester crea sentimento di siguridad.

Si un hende ta sinti cu cos no ta bay manera nan ta desea, e cerebro ta bay den estado emocional. Pa por sali for di e estado emocional, e persona mester sinti su mes conecta bek cu e hendenan den su ambiente directo.

Ora e cerebro ta den e estado ehecutivo,  un persona ta den e situacion den cual e por resolve problema, haci cambio y haci escogencianan sabi. Pa e cerebro ta den e estado aki nos por haci uzo di diferente tecnica pa saca nos mes for di e estado di sobrevivencia y di e estado emocional.


2  E shete podernan di Disciplina Consciente®

E shete (7) podernan di Disciplina Consciente ta:

  1. E poder di con nos ta percibi un situacion
  2. E poder di sinti nos uni na otro
  3. E poder di  duna y ricibi atencion
  4. E poder cu nos tin pa scoge
  5. E poder di acepta y sinti nos acepta
  6. E poder di amor
  7. E poder di bon intencion


3  E concepto famia di scol™

E concepto aki ta basa riba e shete podernan y ta traha na crea conexion entre scol y cas, entre maestro y maestro, entre maestro y alumno y entre alumno y alumno. Asina ta crea un situacion den cual desaroyo optimal di un y tur por tuma luga. E famia di scol ta logra esaki via rutina, ritual y structura.


4  E shete habilidadnan di disciplina

For di e shete (7) podernan ta sali tambe e shete (7) habilidadnan:

  1. Wanta nos compostura den situacionnan dificil
  2. Encurasha nos mes y otro
  3. Ta asertivo ora cos no bay na un manera aceptabel pa nos
  4. Sa scoge
  5. Sinti empatia
  6. Wak e intento positivo
  7. Anda cu consecuencia di nos comportacion

E shete habilidadnan ta siña nos pa responde riba conflicto den un forma cu ta yuda e mucha move di e estado mas abou di su cerebro pa e estado mas cooperativo cu ta e estado ehecutivo di e cerebro.

Implementando e shete podernan y e shete habilidadnan nos ta siña keda den control di nos mes y educando e muchanan na un manera cu nos ta un ehempel di loke nos kier pa nan siña.

Cu Disciplina Consciente®, un cambio den educacion y maneho di klas ta tuma luga. Disciplina a base di forsamento, miedo y premiacion ta keda atras. Den su luga ta bin disciplina cu enfoke riba motivacion cu ta nace di paden, contribucion, resolvimento di problema y conexion.

E programa di Disciplina Consciente® ta originalmente desaroya den contexto di klas, pero ta aplicabel den tur interaccion di e ser humano.  Tin workshops y material desaroya tambe pa e mayor por haci uzo di dje na cas.

 

Noticia

2015
15.06.15 Tur scol primario a ricibi material di Disciplina Consciente
13.01.15 Traimerdia Washington ta haci uzo di Disciplina Consciente
2013
14.05.13 "Connection is Cooperation"
25.04.13 Maestronan satisfecho cu curso di "Conscious Discipline"
2012
03.05.12 Upgradecursus Leidsters Traimerdia succesvol afgerond

 

Info/Contact
DEA | Seccion Guia (Afdeling Begeleiding)