Buscando un topico?
Mustra tur topico

Acreditacion y Reconocemento

 

Estudio acredita

Ki ora ta considera un programa di estudio acredita?

  • Un programa di estudio ta ser considera acredita ora cu un asociacion profesional relevante ta considera cu e programa di estudio como acredita y ta cumpli cu normanan profesional di calidad, estableci y reconoci internacionalmente.

Lesa tambe:

[Opleidingen (op avo-, mbo- en hbo-niveau) die in de media geadverteerd worden]

 

 

Instituto reconoci

Ki ora ta considera un instituto educacional reconoci?

  • Un instituto educacional ta ser considera reconoci ora cu e gobierno di un pais of un organo representando e gobierno di e pais, ta considera e instituto educacional como reconoci y e diploma otorga na final di e estudio ta forma parti e sistema di enseñansa (legalmente reglamenta) di e pais.

 

Unda por haya mas informacion riba estudionan den exterior cu ta reconoci y programanan acredita?

  • Pa estudionan na Hulanda: NVAO (Nederlands-Vlaams Accreditatie Organisatie) [nvao.net]
  • Pa estudionan na Merca: CHEA (Council for Higher Education Accreditation) [chea.org]
  • Pa estudionan den e region Iberoamericano: RIACES (Red Ibero Americano para la Acreditación de Calidad de la Educación Superior) [riaces.org]

 

Unda na Aruba por haya informacion y guia den scogemento di estudio?

 

 

Estudio of curso online

Departamento di Enseñansa Aruba ta haya pregunta riba cursonan riba nivel di MBOHBO cu ta ser promovi den corant y via Facebook cu supuestamente lo ta reconoci na Hulanda segun leynan Hulandes cu ta regarda cursonan ("opleidingen") riba nivel di MBOHBO. A base di esaki Departamento di Enseñansa a tuma contacto cu e instancianan concerni na Hulanda y a haya notificacion for di NVAO Hulanda cu ta indica cu nan no a acredita niun curso (of "opleiding") riba nivel di HBO di NHALOI of NCOI, cu lo ta ser duna of brinda online na ArubaCorsou of Boneiro.

Riba nos pregunta si cursonan riba nivel di MBO cu lo ta ser duna of brinda online via companianan ubica na Aruba, Corsou y Boneiro lo ta reconoci pa e Ministerie van Onderwijs, Cultuur en Wetenschap (MinOCW) manera ta ser propaganda, Departamento di Enseñansa Aruba a haya como contesta for di Onderwijsinspectie Nederland cu e licencia cu institutonan educacional Hulandes tin pa ofrece educacion na Hulanda no ta transferi automaticamente pa Caribisch Nederland (Aruba, Corsou y Boneiro). Cu otro palabra e chens ta grandi cu e cursonan cu ta ser duna of brinda online na Aruba, Corsou y Boneiro no conta cu reconocimento di Hulanda y consecuentemente tampoco di Aruba.


Cua preguntanan mester haci e instituto ora ta considera sigui un estudio of curso 'online'?

  • E instituto educacional ‘online’ ta reconoci na e pais di estudio pa e autoridadnan relevante?
  • E programa(nan) educacional ‘online’ ta acredita pa asociacion(nan) profesional relevante?
  • Cuanto placa (‘lesgeld’) tin cu paga mensual/anualmente pa sigi e curso?
  • E cursista ta haya tur material di estudio ‘online’ of e tin cu cumpra cierto buki(nan) apart?
  • E instituto tin tutornan disponibel den caso cu un studiante no a compronde algo?
  • Di e cantidad di studiantenan cu ta matricula tur aña, ki promedio ta completa e curso/programa di estudio cu nan a sigui y den cuanto tempo?
  • E cursista tin acceso 24/7 pa cursonan ‘online’ of mester sigui cursonan riba dia y oranan specifico?
  • Con ta comunica cu e instituto educacional ora tin un disputa financiero?

SEA ALERTO: Tin hopi instituto educacional ‘online’ cu ta confiabel, sinembargo, tin hopi compania riba internet cu nan unico meta ta pa estafa hende diariamente via nan website.

 

 

Diploma Mill

Kico ta un 'Diploma Mill'?

  • Un ‘Diploma Mill’ ta un ‘instituto educacional’ cu ta den e negoshi di bende of otorga diploma cu no tin NIUN BALOR academico of profesional.
  • Hopi biaha e institutonan educacional aki ta bisa cu nan ta ACREDITA, den letternan GRANDI, sinembargo e acreditacion cu nan tin ta di organisacionnan cu nan mes a lanta cu tampoco tin NIUN MERITO den circulo academico y/of profesional!
  • Semper mester CONTROLA si e instituto academico ta reconoci y acredita pa e autoridadnan competente.
  • Pa yuda haci e determinacion aki Departamento di Enseñansa ta conseha interesadonan pa subi e websitenan di NVAO, CHEA y RIACES, y repasa e informacion cu tin encuanto reconocemento di diploma, acreditacion y ‘diploma mills’.

 

Info / Contact
DEA | Diploma Evaluatie